ئۇيغۇرچە    Uyghurche    Уйғурчә    Ortaq Türkçe   
  • 2018 - يىلى 25 - ئاۋغۇست ئىستانبۇلدا «ئۇيغۇرلار دۇچ كېلىۋاتقان خىرىسلار ۋە ھەل قىلىش يوللىرى ئىلمىي مۇھاكىمە يىغىنى» ئۆتكۈزۈلىدۇ. ...
سىزنىڭ ئورنىڭىز: باشبەت » پايدىلىق ئۇچۇرلار » تۈركىيە ئوقۇش مۇكاپاتى 2018 – يىللىق باكلاۋۇرلۇق ئوقۇش ئىلتىماسى 16 – ئاپرىلدا باشلىنىدۇ

تۈركىيە ئوقۇش مۇكاپاتى 2018 – يىللىق باكلاۋۇرلۇق ئوقۇش ئىلتىماسى 16 – ئاپرىلدا باشلىنىدۇ

تۈركىيە باش مېنىستىرلىكىگە قاراشلىق تاشقى تۈركلەر ۋە قېرىنداش مىللەتلەر باشقارمىسى تۈركىيە ئوقۇش مۇكاپاتى ئورگان www.turkiyeburslari.gov.tr تور بىتىدىكى 2018 – يىللىق ئوقۇ – ئوقۇتۇش كالىندارىغا كۆرە، خىتاي پاسپورتى بار ئۇيغۇر ئوقۇغۇچىلار باكلاۋۇرلۇق (تولۇق كۇرس) ئوقۇشى ئۈچۈن 2018 – يىلى 3 – قېتىملىق تۈركىيە ئوقۇش مۇكاپاتى ئىلتىماس مەزگىلىدە (2018 – يىلى 16 – ئاپرىلدىن 14 – مايغىچە) تۈركىيە ئوقۇش مۇكاپاتىغا ئىلتىماس قىلالايدىكەن. ئېلتىماس قىلغۇچى ئوقۇغۇچىلار بولسا يۇقارىقى بەلگىلەپ بەرگەن بىر ئاي ئىچىدە ئىلتىماسىنى تاپشۇرىشى كىرەك ئىكەن. ئىلتىماس نەتىجىسىنىڭ ئىلان قىلىنىش ۋاقتى 2018 – يىلى 24 – ئىيۇل كۈنىدە بولىدىكەن.

ياش چەكلىمىسى:

تولۇق كۇرسقا تىزىملاتماقچى بولغانلار: 1997 – يىل 1 – ئاينىڭ 1 – كۈنىدىن كېيىن تۇغۇلغان بولۇشى؛

بۇ ئوقۇش مۇكاپاتى تۆۋەندىكىلەرنى ئۆز ئىچىگە ئالىدۇ:

ئايلىق ئوقۇش مۇكاپاتى 700 تۈرك لىراسى

بىر يىل تۈركچە تىل تەربىيىلەش كۇرسىدا ھەقسىز ئوقۇش

ئالىي مەكتەپ ئوقۇش پۇلى

ھەقسىز ئوقۇغۇچىلار ياتىقى

سالامەتلىك سوغۇرتىسى

تۈركىيەگە تۇنجى قېتىمقى كېلىش ۋە ئوقۇش پۈتتۈرگەندىكى قايتىش ئايرۇپىلان بېلەتلىرى

تۈركىيە ئوقۇش مۇكاپاتىغا ئېرىشكەن ئوقۇغۇچىلار تاماق ۋە تۇرمۇش خىراجىتى ئۈچۈنلا دۆلەتتىن بەرگەن ئايلىق ئوقۇش مۇكاپاتىنى خەجلەيدۇ، باشقا ئوقۇش پۇلى، ياتاق پۇلى، داۋالىنىش راسخۇتى دېگەندەك چىقىملارنىڭ ھەممىسىنى تۈركىيە دۆلىتى كۆتۈرىدۇ. شۇڭا بو ئوقۇش مۇكاپاتىغا ئېرىشكەن ئوقۇغۇچىلارنىڭ ئاتا – ئانسى خاتىرجەم ھالدا باللىرىنى تۈركىيەدە ئوقۇتسا بولىدۇ.

تۈركىيە ئوقۇش مۇكاپاتى ئىلتىماسى ئۈچۈن تۆۋەندىكى ئۇلانمىنى زىيارەت قىلىڭ:

www.turkiyeburslari.gov.tr

تۈركىيە دۆلەتلىك تولۇق كۇرس، ماگېستىرلىق ۋە دوكتۇرلۇق ئوقۇش مۇكاپاتى ئىلتىماسى ھەققىدە دېققەت قىلىشقا تېگىشلىك مۇھىم نوقتىلار

2017-يىلى تۈركىيەدە تولۇق كۇرس، ماگىستىرلىق ۋە دوكتۇرلۇقتا ئوقۇش ئۈچۈن، 191 دۆلەتتىن 100 مىڭدىن ئارتۇق ئوقۇغۇچى ئىلتىماس قىلغان بولۇپ، بونىڭ ئىچىدىن تەلەپكە لايىق بولغان 7 مىڭ ئەتراپىدا ئوقۇغۇچى قۇبۇل قىلىنغان. 2018-يىلى ھەرقايسى دۆلەتلەردىن تۈركىيەدە ئوقۇشقا ئىلتىماس قىلىدىغانلارنىڭ سانى تېخىمۇ كۆپ بولىشى مۇمكىن. ئەمما قۇبۇل قىلىنىدىغان ئوقۇچى سانى 7000 ئەتراپىدا بولىدىغانلىقى تەخمىن قىلىنماقتا. مەيلى قايسى دۆلەتتىن قانچە كۆپ كىشى ئىلتىماس قىلىشىدىن قەتئىي نەزەر، ھەرقايسى قىتئەلەردىكى دۆلەتلەر بويىچە باھالاش ئېلىپ بارىدىغان بولغاچقا، مەلۇم بىر دۆلەتكە مۇقىم قىلىپ ئايرىپ بېرىلگەن سان يوق. كىمنىڭ ئوقۇش نەتىجىسى ياخشى ۋە يۈز تۇرانە ئىمتىھاندا قايىل قىلارلىق نەتىجە ئالالسا، بۇ ئوقۇشنى شۇ قولغا كەلتۈرەلەيدۇ. بۇنىڭدىن كۆرۇۋېلىشقا بولىدۇكى، رىقابەت ئىنتايىن كەسكىن، ئەمما تاللاش ئادىل بولىدىكەن.

تولۇق كۇرس ئوقۇشى ئۈچۈن تۈركىيە دۆلەتلىك ئوقۇش مۇكاپاتىغا ئىلتىماس قىلغۇچى نامزاتلارغا قويۇلىدىغان شەرتلەر

تۈركىيە تولۇق كۇرس ئوقۇش مۇكاپاتى پروگراممىسىغا ئىلتىماس قىلغۇچى نامزاتلارغا قويۇلىدىغان شەرتلەر تۆۋەندىكىچە:

چەتئەللىك بولۇشى (تۈركىيە جۇمھۇرىيىتى گراژدانلىرى ۋە ھەرقانداق سەۋەب تۈپەيلىدىن تۈركىيە گراژدانلىقىدىن چىقىپ كەتكەنلەر تىزىملىتالمايدۇ)؛

تۈركىيەدە ئوقۇشىغا توسالغۇلۇق قىلىدىغان ئەھۋالنىڭ بولماسلىقى؛

تولۇق كۇرسقا تىزىملىتىش ئۈچۈن تولۇق ئوتتۇرا مەكتەپنى پۈتتۈرگەن بولۇشى ياكى تىزىملىتىدىغان يىلى ئوقۇش پۈتتۈرىدىغان بولۇشى؛

تولۇق كۇرسقا تىزىملاتماقچى بولغانلار: 1997 – يىل 1 – ئاينىڭ 1 – كۈنىدىن كېيىن تۇغۇلغان بولۇشى؛

ئۇنىڭدىن بۇرۇن تۈركىيە جۇمھۇرىيىتىنىڭ ھەرقانداق بىر دۆلەت ئورگىنىدىن تولۇق كۇرس، ئاسپرانتلىق، دوكتۇرلۇق ياكى تەتقىقات ئۈچۈن ئوقۇش مۇكاپاتى ئالمىغان بولۇشى؛

تۈركىيەدىكى ئۇنىۋېرسىتېتلاردا تولۇق كۇرس، ئاسپرانتلىق ۋە دوكتۇرلۇقتا تەڭ دەرىجىدىكى ئوقۇشتا تىزىملىكى بولماسلىقى كىرەك.

تولۇق كۇرسقا ئىلتىماس قىلىش ئۈچۈن كېرەكلىك ماتېرىياللار:

زۆرۈر كېرەكلىك ماتىرىياللار:

پاسپورت ۋە سىكەن نۇسخىسى

ئىككى سۇڭلۇق رەسىم ۋە سىكەن نۇسخىسى

ئالاقە تېلفۇن نۇمۇرى ۋە پوچتا ئادىرىسى

تولۇق ئوتتۇرا مەكتەپ دىپلۇمى ۋە سىكەن نۇسخىسى

تولۇق ئوتتۇرا مەكتەپ دەرس نەتىجىلىرى، خۇلاسە ئىمتىھان نەتىجىسى ۋە سىكەن نۇسخىلىرى

تولۇق ئوتتۇرا مەكتەپ دەرس نەتىجىلىرى ۋە خۇلاسە ئىمتىھان نەتىجىلىرىنىڭ ئىنگلىزچە تەرجىمە نۇسخىلىرى

ئىختىيارى ئەمما تاللىنىشتا ھەل قىلغۇچ مۇھىم ئەھمىيىتى بولغان ماتېرىياللار:

تۈركىيەدىن باشقا يەرلەردە ئالىي مەكتەپ تولۇق كۇرسقا ئۆتكەن بولسا چاقىرىق قەغىزى ياكى ئىسپاتى

تىل كېنىشكىلىرى ۋە سىكەن نۇسخىلىرى: خەنزۇچە سەۋىيە سىناش كېنىشكىسى (HSK)، ئىنگلىزچە كېنىشكىلەر (CET-4, 6, TOEFL, IELTS)

مۇكاپاتلار: ئوقۇش جەريانىدا ئالغان ھەرخىل مۇكاپات كېنىشكىلىرى (ئوقۇش مۇكاپاتى، تەنتەربىيە، سەنئەت ۋە كەشپىيات قاتارلىق ساھەلەردە ئېرىشكەن مۇكاپاتلار)

تۈركچە تىل كېنىشكىسى: تۈركچە كۇرس دىپلۇمىلىرى ياكى تۈركچە سەۋىيە سىناش كېنىشكسى (TYS)

ئىككى پارچە تەۋسىيە خېتى: ئالىي مەكتەپ ئوقۇتقۇچىسى ۋە ئۆزىڭىز ئوقۇماقچى بولغان ساھەدىكى كەسىپ ئىگىسىنىڭ تەۋسىيە خەتلىرى

تۈركىيە ئوقۇش مۇكاپاتىغا توردىن ئىلتىماس قىلغان ئۇيغۇر ئوقۇغۇچىلارنىڭ دىققەت قىلىشىغا تىگىشلىك مۇھىم نوقتىلار

تۈركىيەدە ئوقۇش مۇكاپاتىغا ئىلتىماس قىلغان ئۇيغۇر ئوقۇغۇچى نامزاتلىرىنىڭ تۆۋەندىكى بىر قانچە نوقتىلارغا ئەھمىيەت بەرگەندە، تاللاشتا غەلبە قىلىش پۇرسىتى تېخىمۇ چوڭ بولىشى مۇمكىن.

تۈركىيە ئوقۇش مۇكاپاتى تورىنى ۋە تۈركىيە ئوقۇش مۇكاپاتى بەلگىلىمىسىنى تەپىسىلى كۆرۈپ ئوقۇپ چىقىڭ.

تۈركىيەدە ئوقۇش ئىلتىماس تور بېتى www.turkiyeburslari.gov.tr تۈركچە ۋە ئىنگىلىزچە بولغاچقا، ئىلتىماس جەدىۋېلىنى توغرا ۋە تولۇق تولدۇرۇش ئۈچۈن، بۇ ئىككى تىلدىن بىرىنى ياخشى بىلىشىڭىز كىرەك.  ئەگەر ئىنگلىزچە ياكى تۈركچە بىلمىسىڭىز، بۇ تىللاردىن بىرىنى ياخشى بىلىدىغان ۋە ئالىي مەكتەپنى پۈتتۈرگەن بىرسىدىن (ماگىستىرلىق ياكى ئۇنىڭدىن يوقىرى ئوقۇش تارىخىغا ئىگە بولغان كىشىدىن) ياردەم تەلەپ قىلىسىڭىز بولىدۇ.

ئىلتىماستا تەلەپ قىلغان پۈتۈن ماتىرىياللارنى رەڭلىك تاراپ (سىكەن ياكى ساۋمىياۋ) قىلىۋېلىپ، بارماق دىسكىڭىزغا رەسىم (JPEG) شەكلىدە قاچىلىۋېلىڭ.

www.turkiyeburslari.gov.tr تورىدىكى ئىلتىماس قەدەم باسقۇچلىرىنى ئەستايىدىل تولدۇرۇڭ. تەلەپ قىلغان پۈتۈن ماتىرىياللارنى تورغا يۈكلەپ، پۈتۈن باسقۇچلارنى بېسىپ بولغاندىن كېيىن، باشتىن ئاخىرى تەپسىلى تەكشۈرۈپ، كەم ياكى خاتالىقلارنى تۈزۈتۈپ، ئەمدى بولدى دىگەندە، ئاندىن ئەڭ ئاخىرقى تەستىقلاشنى تاماملىسىڭىز بولىدۇ.

مەكتەپ تاللاشتا، ئوقۇش ئەھۋالىڭىز ئالاھىدە ياخشى بولغان تەقدىردىمۇ، پۈتۈن مەكتەپلەرنى ئىستانبۇل، ئەنقەرە ۋە ئىزمىر قاتارلىق چوڭ شەھەرلەردىن تاللىماڭ.

سىز تاللايدىغان 12 مەكتەپنى تاللىغاندا، ئىستانبۇلدىن 1 ياكى 2 نى ، ئەنقەرەدىن 1 ياكى 2 نى ۋە ئىزمىردىن 1 ياكى 2 مەكتەپ تاللاپ، قالغان 6 ياكى 6 دىن كۆپ مەكتەپنى چوقۇم بۇ ئۈچ چوڭ شەھەردىن باشقا شەھەرلەردىن تاللاڭ. ئىسىڭىزدە بولسۇنكى، سىز 12 ئارزۇغا 12 مەكتەپنى تولۇق تولدۇرۇشىڭىز كىرەك.

كەسىپ تاللاشتا:

تولۇق كۇرستا ئوقۇش ئۈچۈن، سىز ئەڭ ياخشى كۆرگەن ۋە ئۆز قابىلىيىتىڭىزگە ماس كەلگەن كەسىپنى تاللاڭ، ھەرگىزمۇ مودا قوغلىشىپ، ئىقتىدارىڭىز ماس كەلمىگەن ياكى ئۆزىڭىز قىزىقمايدىغان كەسىپنى تاللىماڭ.

تولۇق كۇرۇسقا كەسىپ تاللىغاندا ياخشى ئويلىنىپ ئۆزىڭىز ئەڭ ياخشى كۆرۈدىغان، ئۆزىڭىزنىڭ قابىلىيىتىنى ئەڭ ياخشى جارى قىلدۇرالايدىغان كەسپنى ۋە شۇنىڭغا يېقىن كىلىدىغان كەسپلەرنىلا تاللاڭ. مەسىلەن: ئىجتىمائىي پەندە ئوقۇيمەن دەپ، بىر مەكتەپتىن ئەدەبىيات، بىر مەكتەپتىن تارىخ، بىر مەكتەپتىن ئىقتىساد، بىر مەكتەپتىن خەلقئارا مۇناسىۋەت، بىر مەكتەپتىن خەلقئارا سودا ۋە يەنە بىر مەكتەپتىن ئىقتىساد دىگەندەك كەسپلەرنىڭ ھەممىسىنى تاللىۋالماڭ. تەبىئى پەندە ئوقۇيمەن دەپ، بىر مەكتەپتىن فىزىكا، بىر مەكتەپتىن خېمىيە، بىر مەكتەپتىن ماتىماتىكا، بىر مەكتەپتىن كومپىيوتېر، بىر مەكتەپتىن ماشىنسازلىق ۋە يەنە بىر مەكتەپتىن بىئولوگىيە دىگەندەك كەسپلەرنىڭ ھەممىسىنى تاللىۋالماڭ. ماتىرىيالىڭىزنى كۆرۈپ سىزنى تاللايدىغان كىشى سىزنى ئېنىق بىر نىشانى يوق، كەسىپ ئەھلى بولۇشقا لاياقەتسىز بىر ئوقۇغۇچى ئىكەن دەپ شاللىۋىتىش ئىھتىمالى يۇقىرى بولۇپ، رىقابەتتە ئۇتتۇرۇپ قويىسىز. شۇڭا سىز تاللىماقچى بولغان 12 مەكتەپتىن ئۆزىڭىز ئەڭ ياخشى كۆرىدىغان ۋە ئۆزىڭىزنىڭ قابىلىيىتىنى ئەڭ ياخشى جارى قىلدۇرالايدىغان كەسپنى ۋە شۇنىڭغا يېقىن كىلىدىغان كەسپلەرنىلا تاللاڭ.

مەكتەپ تاللاشتا، 12 مەكتەپ تەرتىپىنى ھەرگىزمۇ داڭلىقلىق دەرىجىسى بىلەن تىزماڭ، بەلكى سىزگە ماس كىلدىغان تەرتىپتە بولسۇن.

ھىچقانداق ئىنگلىزچە نەتىجىڭىز يۇق ۋە ئۇتتۇرىچە نەتىجىڭىز 60 ئەتراپىدا تۇرۇپ، ئۇتتۇرا شەرق تېخنىكا ئۇنىۋېرسىتېتى، بوغازئىچى ئۇنىۋېرسىتېتى ۋە ئىستانبۇل تېخنىكا ئۇنىۋېرسىتېتى دىگەندەك ئىنگلىزتىلىدا ئوقۇتۇش ئېلىپ بارىدىغان مەكتەپلەرنى تاللىۋالماڭ. سىز بۇ خىلدىكى مەكتەپلەرنى تاللىماقچى بولغاندا، ئىكراندا سىزگە ئاگاھلاندۇرۇش بىرىلىدۇ.

كەسىپ تاللاشتا، ئىنگلىزچە ئوقۇتۇش ئېلىپ بېرىلىدىغان كەسپلەرنى تاللاش ئۈچۈن، ئەگەر سىزنىڭ ئىنگلىزچە TOEFL / IELTS ۋە GRE قاتارلىق ئىمتىھانلاردىن ئومۇمى نۇمۇر ۋە يەككە تۈرلەردىكى نومۇرىڭىز مەكتەپلەرنىڭ سىز تاللىماقچى بولغان كەسپكە قويغان ئۆلچىمىگە چۈشسە، ئاندىن ئىنگلىزچە ئوقۇتۇش ئېلىپ بارىدىغان ئوخشاش كەسىپ ئۈچۈن 2 ياكى 3 مەكتەپنى تاللىسڭىز بولىدۇ. قالغانلىرىنى تۈركچە ئوقۇتۇش ئېلىپ بارىدىغان كەسپ ۋە مەكتەپلەرنى تاللىسىڭىز تاللىنىش پۇرسىتىڭىز يوقىرى بولىدۇ.

جەدىۋەل تولدۇرغاندا يۇلتۇز بەلگىسى(*) قۇيۇلغانلارنىڭ ھەممىسىنى تۇلدۇرغاندىن سىرت، بەلگە قويۇلمىغانلارنىمۇ چوقۇم تولدۇرۇشقا تىرىشىڭ ۋە تەلەپ قىلىنغان ماتېرىياللارنىڭمۇ بەلگە قويۇلسۇن ياكى قويۇلمىسۇن ھەممىنى يوللاڭ، ئامال بار بوش يەر قالمسۇن.

قىزىقىمەن دەپلا قابىلىيىتىڭىزگە ماس كەلمىگەن قېيىن كەسىپنى تاللىۋالماڭ، پەۋقۇلاددە قابىليىتىڭىز بولۇپ، تاللىغۇچىنى قايىل قىلالمىسىڭىز تاللىنىش ئېھتىمالىڭىز تۆۋەن بولۇپ قالىدۇ.

توردىن ئىلىتىماس جەدىۋېلىنى تولدۇرغاندا، ئۆزىڭىزنىڭ نىمە ئۈچۈن تۈركىيەدە ئوقۇش ئارزۇيىڭىز بارلىقىنى يازىدىغان قىسمىغا ئالاھىدە ئەھمىيەت بېرىڭ ۋە يۈز تۇرانە ئىمتىھاندىمۇ مۇشۇ قىسىمغا يازغان مەزمۇننى چۆرىدىگەن ئاساستا بايان قىلىڭ.

ئوقۇش مۇكاپات تۈرىدىن قانچە تۈرنى تاللاش ئىمكانىڭىز بولسا ۋە ئوقۇش ئەھۋالىڭىز ماس كەلسىلا ھەممىنى تاللاڭ. ئامما تاللىغان كەسىپلەر بىر-بىرگە موناسىۋەتلىك بولسۇن. بولمىسا بۇ ئوقۇغۇچى نىمە ئوقۇشىنى بىلمەيدىكەن دەپ ئىلغىنىپ كەتمەڭ.

ئىسىڭىزدە بولسۇنكى، بۇ ئوقۇشقا قۇبۇل قىلىشتا، تۈركىيە تەرەپ ئىلتىماس قىلغۇچىلارنىڭ ئوقۇش نەتىجىسىنىڭ يۇقىرى بولۇشىنى تەلەپ قىلىش بىلەن بىرگە، غايىلىك، ئاڭ سەۋىيەلىك بولىشىغىمۇ ئالاھىدە ئەھمىيەت بەرمەكتە، بولۇپمۇ ئوقۇغۇچىدا تىرشىپ ئوقۇيدىغان بىر ئىرادىنىڭ بولىشىغا قارالماقتا.

تۈركىيە ئوقۇش مۇكاپاتى يۈزتۇرانە ئىمتىھانىغا چاقىرىلغان ئوقۇغۇچىلارنىڭ دىققەت قىلىشىغا تىگىشلىك مۇھىم نوقتىلار:

تۈركىيەدە ئوقۇش مۇكاپاتىغا ئىلتىماس قىلغان ئۇيغۇر ئوقۇغۇچى نامزاتلىرىنىڭ يۈز تۇرانە ئىمتىھاندا، تۆۋەندىكى بىر قانچە نوقتىلارغا ئەھمىيەت بەرگەندە، تاللاشتا غەلبە قىلىش پۇرسىتى تېخىمۇ چوڭ بولىشى مۇمكىن.

1) سىز توردىن تۈركىيەدە ئوقۇشقا ئىلتىماسىڭىزنى غەلبىلىك تاماملاپ بولغاندىن كېيىن، 2-3 كۈندە بىر ئېلخەت ئادىرىسىڭىزغا قاراپ تۇرۇشنى ئۇنتۇماڭ.

ئوقۇش ئەھۋالىڭىز ياخشى بۇلۇپ، ئىلتىماسنى ئەستايىدىل ۋە تەلەپكە لايىق تولدۇرغان بولسىڭىز، سىز بەلگىلەنگەن ۋاقىت ئىچىدە يۈز تۇرانە ئىمتىھانغا چاقىرىلىسىز. يۈز تۇرانە ئىمتىھان ۋاقتى نورمالدا ماگىستىر ۋە دوكتۇرلۇقتا ئوقۇيدىغانلار ئۈچۈن 4- ياكى 5-ئايلاردا، باكلاۋۇرلۇقتا ئوقۇيدىغانلار ئۈچۈن 6- ياكى 7-ئايلاردا بولىشى مۈمكىن. توردىن ۋە ئېلخېتىڭىزدىن دائىم تەكشۈرۈپ تورۇڭ.

2) يۈز تۇرانە ئىمتىھان تۈركچە، خەنزۇچە ياكى ئىنگلىزچە ئېلىپ بېرىلىدىغان بولغاچقا، بۇ تىللارنىڭ بىرىدە ئۆزىڭىزنى ياخشى ئىپادىلەپ بىرەلەيدىغان ۋە سورىغان سۇئاللارغا جاۋاپ بىرەلەيدىغان بولىشىڭىز كىرەك.

ئەگەر ئىنگلىزچە بىلسىڭىز، يۈز تۇرانە ئىمتىھاننىڭ ئاخىرقى بىر قانچە مىنۇتلىرىدا ئۆزىڭىزنىڭ ئىنگلىزچە بىلىدىغانلىقىڭىزنىمۇ كۆرسىتىپ قويۇشىڭىز سىزگە پايدىلىق.
نىمە ئۈچۈن تۈركىيەدە ئوقۇيسىز؟ دىگەن سۇئالغا، مەن تۈركىيەگە قىزىقىمەن، ئۇيغۇرلارمۇ تۈرك ئىرقىدىن دەپلا جاۋاپ بەرمەي، ئوقۇش ھاياتىمدا ئوخشىمىغان مۇھىتتا ۋە ئوخشىمىغان دۆلەتلەردە ياشاپ، ئوخشىمىغان ئىنسانلارنى ۋە دۆلەتلەرنى چۈشىنىپ بېقىش ئارزۇيۇم بار. مەن ئوقۇشتىن سىرت ھەرخىل ئىجتىمائىي مۇھىتتا ياشاپ، دۇنيا كۆز قارىشىمىنى ۋە ھايات تەجرىبىلىرىمنى بېيىتقۇم بار… دىگەندەك جاۋابلارنى بەرسىڭىز ياخشى بولىشى مۇمكىن.

3) يۈز تۇرانە ئمتىھاندا، ھىچ بولمىغاندا ئەڭ باشتا 2-3 ئېغىز تۈركچە سالاملىشىڭ ۋە بۇلارنى بۇ تىلغا قىززىققانلىقىڭىز ئۈچۈن ئۆگەنگەنلىگىڭىزنى دەڭ. ئەگەر تۈركچە ياخشى ئىپادىلىيەلمىسىڭىز، ئاندىن خەنزۇچە ۋە ئىنگلىزچىنىڭ قايسىسىدا ياخشى سۆزلىيەلىسىڭىز شۇ تىلدا سۆزلەڭ.

چۇنكى سىز بىلەن كۆرەشكۈچىمۇ سىز بىلەن ئۆزلىرى بىلگەن تىللاردا ئەڭ ياخشى پىكىر ئالماشتۇرالايدۇ، ھەر قانچە قابىليىتىڭىز بولسمۇ ئۇلار كۆرمسە بىكار.

4) تۈركىيەدە ئوقۇپ بولغاندىن كېيىن، يۇرتىڭىزغا قايتىش ياكى قايتماسلىق ھەققىدىكى سۇئالغا ئوقۇش پۈتتۈرۈپ قايتىپ يۇرتۇمنى گۈللەندۈرۈمەن، ئەگەر قايتىشقا ئىمكان بولمىسا قايىتماي مىللىتىمنىڭ كۈچلىنشى ئۈچۈن خىزمەت قىلىمەن دەپ جاۋاپ بېرىڭ.

5) ئىلتىماس جەدىۋېلىدە نېمىنى يازغان بولسىڭىز ۋە قانداق ماتېرىيال يۈكلىگەن بولسىڭىز، يۈز تۇرانە ئىمتىھانىغا ھەممە ئسپاتلارنى تولۇق ئېلىپ بېرىڭ، يالغانچىلق قىلماڭ.

6) يۈز تۇرانە ئىمتىھانغا كىرگەندە، كىيىملىرىڭىز ئاددى ۋە رەتلىك، ئۈستى بېشىڭىز پاكىز ۋە چاچ ساقاللىرىڭىز تاراقلىق بولسۇن. ئامال بار يۈز تۇرانە ئىمتىھانغا غەيرى كىيىملەرنى كىيىپ كىرمەڭ. ئۇلۇغۋار نىشانلارنى قەلبىڭىزگە پۈككەن ئۇيغۇر ئوقۇغۇچى ئىكەنلىكىڭىزنى ئىپادىلەڭ. چوقۇم ئانا تىلىڭىزدە بىر-ئىككى ئىغىز سۆز قىلىڭ ۋە ئۆز مىللىتىڭىزنىك مۇھىم ئۆرۈپ-ئادەتلىرنى تونۇشتۇرۇڭ.

ئاخىرىدا، ئاكادېمىيە نامىدىن تۈركىيەدە ئوقۇشقا ئىلتىماس قىلغان بارلىق ئۇيغۇر ئوقۇغۇچىلىرىمىزنىڭ ئوقۇشىلىرىغا غەلبە، ئەزىز تەنلىرىگە سالامەتلىك تىلەش بىلەن بىرگە، ئاكادېمىيە ئوقۇغۇچى ئىشلىرى بۆلۈمى ئۇيغۇر ئوقۇغۇچىلارغا ئوقۇش مەسلىھەتى ۋە چۈشىنىكسىز سۇئاللىرىغا جاۋاب بېرىش ئۈچۈن ھەرۋاقىت ياردەمدە بولىدۇ.

– ئۇيغۇر ئاكادېمىيىسى ئوقۇغۇچى ئىشلىرى بۆلۈمى

Yanfun: 0090-5079758225

Telefon: 0090-2125897667

E-mail: uyghuracademy@gmail.com

يازغۇچى ھەققىدە

ماقالە سانى : 1190

ئاكادېمىيە ئورگان تورى ©

ئۈستىگە قايتىش