ئۇيغۇرچە    Uyghurche    Уйғурчә    Ortaq Türkçe   
  • 2017- يىلى 11- ۋە 12- نويابىردا ئىستانبۇلدىكى فاتىھ سۇلتان مەھمەت ۋەخپە ئۇنىۋېرسىتېتىنىڭ فاتىھتىكى مۇدىرىيەت بىناسىدا «ئۇيغۇر مەدەنىيىتى تەتقىقاتى» ئىلمىي مۇھاكىمە يىغىنى ئۆتكۈزۈلىدۇ. ۋاقتىدا
سىزنىڭ ئورنىڭىز: باشبەت » ئومۇمى » ”دىۋانى كەبىر“ دىن دۇردانىلەر

”دىۋانى كەبىر“ دىن دۇردانىلەر

Email this to someoneTweet about this on TwitterShare on LinkedIn0Print this pageShare on Facebook33Share on Google+0

تەرجىمە: ھەبىبۇللا ئابلىمىت

ئۆزەڭدىن ئۆزەڭ سەپەر قىل

ئەگەر دەرەخنىڭ پۇتى ۋە قانىتى بولۇپ ھەركەت قىلىدىغان بولسا ئىدى، ئۇنداقتا يا ھەرىنىڭ ھەرىدەشلىرىنىڭ ياكى پالتىنىڭ ئازاپلىق يارا ئىزلىرىنىڭ دەرتلىرىنى تارتمىغان بولاتتى.

قۇياش قاناتلىق ۋە ئاياقلىق بولۇپ پۈتۈن كېچە ئۇچۇپ كەتكەن بولسا ئىدى، جاھان سەھەر ۋاقتىدا قانداقمۇ يورۇتۇلغان بولاتتى؟

دېڭىزدىن ئاچچىق سۇ ئۇپۇققا قاراپ كۆتۇرۇلمىگەن بولسا ئىدى، گۈلىستاننىڭ ھاياتى سەل ۋە يامغۇرغا قانداقمۇ باغلىق بولغان بولاتتى؟

تامچىلار، ۋەتىنى بولغان دېڭىزدىن ئايرىلىپ قايتا كەلگەندە، سەدەپكە تىزىلگان ئۇنچە بولدى.

يۈسۈپ يىغلاپ تۇرۇپ دادىسىدىن ئايرىلىپ سەپەرگە چىقمىدىمۇ؟ سەپەر ئارقىلىق سائادەتكە، مۇلۇككە، زەپەرگە ئېرىشمىدىمۇ؟

جانابى مۇستاپا (س ئە ۋ) يەسرىب تەرەپكە ئۇدۇل سەپەر قىلمىدىمۇ؟ سەپەردە سەلتەنەتلىك بولۇپ ئىقلىملەر سۇلتانى بولمىدىمۇ؟

ئەگەر سېنىڭ مانا مۇشۇنداق بىر سەپەرگە تاقىتىڭ ۋە جىدامچانلىقىڭ بولمىسا ئۆزەڭدىن ئۆزەڭ سەپەر قىل. ياكى مەدەنلىرىدەك قۇياشنىڭ نۇرىدىن ئۆزەڭدە بىر ئەسەر ھاسىل قىل.

ئەپەندىم! قايتا تەكرارلايمەن، ئۆزەڭدىن ئۆزەڭنى سەپەر قىل. چۈنكى بۇنداق بىر سەپەر بىلەن مەدەنلىرىڭنىڭ توپىلىرى تىگىشىپ ئالتۇن بولىدۇ. ئاچچىق ۋە چۈچۈمەللىكتىن تاتلىقلىققا قاراپ يۈزلەن. قانداق قىلىپ شىكەر مىڭ تۈرلۈك ئاچچىقلىقتىن قۇتۇلۇپ شېكەر بولدى؟

تەبرىزگە ئىپتىخار ئاتا قىلغان شەمسدىن تاتلىق ئىستە. ئۇنىڭدا ھەرقانداق مېۋە قۇياشنىڭ نۇرىدىن مەيباغلاپ كىتىدۇ.

باھار

يىقملىق باھار كەلدى. يارنىڭ ئەلچىسى كەلدى. بىز بولساق مەستانە، ئاشىق، ھالسىز ۋە قارارسىز.
ئەي كۆز، ئەي زىيا! باغقا ئۇدۇل بار. چىمەن گۈزەللىرىنى ساقلاتما. چىمەنزارلىققا غايىپ ئالەمدىن غېرىبلار كەلدى. بارغىن، تىز بارغىن. چۈنكى يولدىن كەلگەننى يوقلاش ئادىتىمىزدۇر. گۈل، سېنى كۈلدۈرۈش ئۈچۈن گۈلشەنگە كەلدى. تىكەن، سېنىڭ يۈزۈڭنى كۆرۈش ئۈچۈن گۈزەللەشتى.

ئەي سەرۋى! قۇلاق سال. زىغىر چىچەكلىرى ئىرىقنىڭ قىرلىرىدا سېنىڭ گۈزەللىكىڭنىڭ ئالدىدا تىللىرى تۇتىلدى. غۇنچىلار ئىچىلمايلا تۇرۇلۇپ قالدى. لۇتفۇڭ (مەرھەمەتىڭ) تۈرۈلۈپ، تۈگۈلۈپ قالغان چىگىشلەرنى يېشىدۇ. بۇلار سېنى كۆرسە ئىچىلىدۇ.

خۇددى قىيامەتتەك، باھار مەزگىلىدە ئالدىنقى يىلى چىرىپ ئۆلگەن نەرسىلەر قايتىدىن بىخلىنىپ تۇپراقتىن باشلىرىنى چىقاردى. ئۆلۈك ئۇرۇقلار قايتىدىن تىرىلدى. بۇ تۇپراقنىڭ ئاستىغا يوشۇرۇنغان سىرلار ئەمدى ئاشكارىلاندى. مىۋىلىك كۆچەتلەر چىچەكلەپ، خوشاللىقىدىن نازلىنىپ لىڭشىدى. مىۋەسىز كۆچەتلەر خىجىللىق ئىچىدە ئەپسۇسلاندى. روھ دەرەخلىرىنىڭ ئاقىۋىتىمۇ ئەنە ئاشۇنداق بولىدۇ. ياخشى دەرەختىن تەلەيلىك شاخلار ئۆسىدۇ.

باھاردا، دەرەخنىڭ شاخلىرى خۇددى بىر قوشۇندەك رەتلىك تىزىلىپ، جەڭگە تەييارلىنىپ تۇرىدۇ. ئاق ياسىمىنلار ۋە يېشىللىقلار زۇلپىقارغا قالقان تۇتىدۇ.

باھاردا مانا ماشۇلارنى كۆر. تەڭرىنىڭ سەنئەت ئىقتىدارىدىكى گۈزەللىكلەرنى بىر-بىرلەپ كۆزدىن كەچۇر.
توغرا، تەڭرى ياردەم قىلىدىغانلار بولسا، بىر پاشىمۇ نەمرۇتنى ئۆلتۈرەلەيدۇ.

دوستتىن بىزگە بىر سۆيگۈ

كۆڭۈل، گۈزەل جامالىڭغا قارىغان چاغدىمۇ ساڭا ئىنتىزاردۇر. جان، گۈلىستانىڭىزدا مەست بولغاندىمۇ يەنە ئىستىراپ ئىچىدە.

ئۇنىڭ قارىغان چاغدىكى پاقىراقلىغى، كۆڭۈلنى قوغدايدىغان بىر تىلسىماتتۇر. ئۇ قاراش، كۆڭۈلنىڭ ئوڭ تەرىپىدە بىر پەرى، سول تەرىپىدە بىر گۈزەلدۇر.

ھەر سەھەر ۋاقتىدىن تارتىپ، كېچە-كۈندۇزىڭنىڭ ئەسىرى بىز. دوستتىن بىزگە بىر سۆيگۈ. بىزدىن ئۇنىڭغا يۇز مىڭ سەجدە.

ئۆتۈپ كەتكەن بۇ ئۆمۇرنىڭ يىللىرىنى ئارقىغا ياندۇرغىنى بولمىسىمۇ، بۇ يىللىرىمىز ئاشىقلار سەۋداسىدا بىر چەمبەردىن ئىبارەت ئەمەسمۇ؟

ھاياتنىڭ بۇ جۇلالىسىغا قارشى سەن ئاشىق سازىڭنى ياڭرات. چۈنكى كۆكلەرگە قاراپ ئۆسمىگەن مىۋە كۆچىتى مىۋە بەرمەيدۇ. دېڭىزغا شۇڭغۇغان، دېڭىزنىڭ ئىچىدىن جان ئۇنچىسىنى تاپالايدۇ.
بۇ دېڭىز، بۇ ئۇنچىلەر سېنىڭ ياقۇتدەك لەۋلىرىڭگە تەلمۈرۈپ نالە قىلىدۇ.
سېنىڭ شېكەردەك تاتلىق ئاغزىڭ بىلەن پۇۋلىگەن نەيدىن چىققان نەغمىلەردىن سۆگەتنىڭ ئەۋىرىشىم تاللىرى تولغۇنۇپ ئۇسۇلغا چۈشىدۇ. چىنارلارنىڭ ئىككى نازۇك قوللىرى ئۇرۇپ چاۋاك چالىدۇ ۋە ئۇزاقلاردىن، ئاشىق سوپىلىرىنىڭ سەۋدا ماجىرالىرىغا قاراپ، تاللىرى سوپىلاردەك بىر-بىرىنى تۇتۇپ، چىڭ قوچاقلايدۇ.

جان ئالەمىنىڭ سىرتىغا مەستانە بولۇپ چىققاندا، سەلدەك دېڭىزغا قاراپ ئۇدۇل توختىماي ئاقىدۇ.

ساداقتىن چىققان ئوقنىڭ نىشانى بولغىنىدەك، پارچىنىڭ نىشانى پۈتۈنلۈكتۇر. ئۇنىڭ باشقا بىر نىشانغا سانجىلىشى ئىمكانسىز. ئۇ، خوش بىر جاندۇر. يۈز مىڭلەرچە پوست (قوۋزاق) تىن سىرتقا چىقىپ، تۆت ئىلمېنت ھالىتىگە كىلىپ، ئىشلىرى ئوڭۇشلۇق بولىدۇ. ئىچى توغرا بولغانلارنىڭ جانلىرى، ئۇ مەشھۇر جاننى مەدھىلەپ ناخشا ئىيتىش ئۈچۈن، ئۇ جاننىڭ ئىچىدە چاڭ چالىدۇ.
جانلار، ئۇ جاننىڭ ئېتەكلىرىگە يىپىشىدۇ. ئۇ بولسا ئاشىقىدىن خالىس ۋە پاك بىر ئادەم سۈپىتى بىلەن ئەجەل ئېتىكىگە يىپىشىدۇ.
ئەي كۆڭۇل! تەبرىزگە كەت، شەمسۇل-ھەقتىن كىم ئىكەنلىگىنى سورا. مەنالار سىررىنىڭ بۇراقىغا مېنىپ ماڭ.

Email this to someoneTweet about this on TwitterShare on LinkedIn0Print this pageShare on Facebook33Share on Google+0

يازغۇچى ھەققىدە

ماقالە سانى : 1112

ئاكادېمىيە ئورگان تورى ©

ئۈستىگە قايتىش