ئۇيغۇرچە    Uyghurche    Уйғурчә   
  • «3-نۆۋەتلىك مىللىي مەپكۇرە ۋە تەشكىلاتچىلىق كۇرسى» 2019-يىلى 5-ۋە 6-ئۆكتەبىر شەنبە-يەكشەنبە كۈنلىرى ئىستانبۇلدا ئېچىلدى. ...
سىزنىڭ ئورنىڭىز: باشبەت » ئاكادېمىيە » 2-نۆۋەتلىك «ئۇيغۇر ئانا تىل خىزمەت يىغىنى» ئىستانبۇلدا ئۆتكۈزۈلدى.

2-نۆۋەتلىك «ئۇيغۇر ئانا تىل خىزمەت يىغىنى» ئىستانبۇلدا ئۆتكۈزۈلدى.

2019-يىلى 4-ماي شەنبە كۈنى چۈشتىن كېيىن سائەت 2:30 دا ئىستانبۇلدا سۇتۇق بۇغراخان ۋەقپى يىغىن زالىدا ئۇيغۇر ئانا تىل كومىتېتى ئىستانبۇلدىكى ئەزالىرىنىڭ يىغىلىشى بىلەن 2-نۆۋەتلىك «ئۇيغۇر ئانا تىل خىزمەت يىغىنى» ئۆتكۈزۈلدى.

يىغىندا ئالدى بىلەن ۋەتەن ئىچى–سىرتىدا ئانا تىلغا مۇناسىۋەتلىك ئاساسلىق كىتابلار ئۈستىدە مۇزاكىرە ۋە مۇنازىرە ئېلىپ بېرىلدى.

ۋەتەن ئىچى ۋە سىرتىدا تۈزۈلگەن ئېلىپبە كىتاپلىرى ئۈستىدىمۇ مۇھاكىمە ۋە مۇلاھىزە ئېلىپ بېرىلغان بولۇپ، ئۇيغۇر تىلىنىڭ ئەسلىي سۇزۇق تاۋۇشلارنىڭ ئاجىزلىماسلىقتەك قائىدىسىنىمۇ ئاساس قىلغان ھەم شۇنداقلا ۋەتەندىكى ئۇيغۇرلار ئىشلىتىۋاتقان ئىملا قائىدىسىنىمۇ قوشۇمچە ئەسكەرتىش بەرگەن شەكىلدە يېڭىدىن ئېلىپبە كىتابى تۈزۈش ئوتتۇرىغا قويۇلدى ۋە ئۇيغۇر تىلى ۋە تۈركولوگىيە ساھەسىدە خىزمەت قىلىۋاتقان مۇتەخەسىسلەرنىڭ كۈچ چىقىرىشى بىلەن تۇنجى سىناق نۇسخا ئېلىپبە تۈزۈپ چىقىشتا پىكىر بىرلىكى ھاسىل قىلىندى.

ئېلىپبە كىتابى تۈزۈش گۇرۇپپىسىغا، پىروفېسسور دوكتور ئالىمجان ئىنايەت، دوكتور مەغپىرەت كامال، دوتسېنت دوكتور راھىلە قەشقىرى، دوكتور زەمىرە غۇلجالى، گۈلنار ئىمام، مۇيەسسەر ئابدۇلئەھەت، لوقمانجان ھىرا، ئابدۇرېشىت نىياز ۋە ئابدۇللاھ ئىسمائىلدىن تەركىپ تاپقان تەتقىقاتچى ۋە مۇتەخەسىسلەر بەلگىلەندى.

يىغىندا دەرسلىك تۈزۈش خىزمىتى ھەققىدىمۇ مۇزاكىرە ئېلىپ بېرىلدى. مۇزاكىرىدە، بىر قانچە ئۇيغۇر تىلى ۋە تۈركولوگىيە مۇتەخەسىسلىرىدىن تەركىپ تاپقان مەخسۇس دەرسلىك تۈزۈش مۇتەخەسسلىرىگە ھەق بېرىپ ئەڭ قىسقا ۋاقىت ئىچىدە دەرسلىك كىتاب تۈزۈش خىزمىتىنى ئېلىپ بېرىش، تۈزۈلگەن دەرسلىك كىتابلارنى يەنە ئۇيغۇر تىلى ۋە تۈركولوگىيە ساھەسىدىكى مۇتەخەسسلەر تەكشۈرۈپ باھالاپ چىققاندىن كېيىن، ئاندىن كەڭ كۆلەمدە يېيىش ۋە ھەر قايسى دۆلەتلەردىكى ئانا تىل كۇرسلىرىغا تەۋسىيە قىلىش ھەققىدە تەكلىپ-پىكىرلەر ئوتتۇرىغا قويۇلدى.

ساۋادى چىققان ئۇيغۇر ياش-ئۆسمۈرلىرى ئۈچۈن دەرسلىك كىتاب تۈزگەندە، تىلىنى ئاددى ۋە بالىلارنىڭ قىزىقىشىنى ئاساس قىلىپ تۇرۇپ، ئۇيغۇر تارىخى، تارىخى شەخىسلەر ۋە مىللىي مەدەنىيەتنى نىشان قىلغان شەكىلدە مىللىيلىقنى سىڭدۈرگەن ئاساستا تۈزۈش تەۋسىيە قىلىندى.

ياش-ئۆسمۈرلەر ئۈچۈن ئۇيغۇر تىلى دەرسلىك كىتاب تۈزۈش گۇرۇپپىسىغا، دوكتور ئالىمجان يۈسۈپ، دوكتور پەرھات قۇربان تەڭرىتاغلى، دوتسېنت دوكتور ئەركىن ئەمەت، دوكتور زەمىرە غۇلجالى، دوكتور مەغپىرەت كامال، ئادىلجان ئەرئۇيغۇر قاتارلىق تەتقىقاتچى ۋە مۇتەخەسىسلەر بەلگىلەندى.

ياش-ئۆسمۈرلەر ئۈچۈن ئەدەبىيات دەرسلىك كىتابى تۈزۈش گۇرۇپپىسىغا، پىروفېسسور دوكتور ئالىمجان ئىنايەت، دوتسېنت دوكتور راھىلە قەشقىرى، دوكتور گۈلزادە تەڭرىتاغلى، دوكتور ھاجى قۇتلۇق قادىرى ۋە ئابدۇرېھىم دۆلەت قاتارلىق تەتقىقاتچى ۋە مۇتەخەسىسلەر بەلگىلەندى.

مۇھاجىرەتتە ئانا تىلنى ساقلاپ قېلىشتىن ئىبارەت جاپالىق خىزمەت ئۇيغۇر ئانا تىل كومىتېتىگە يۈكلەنگەچكە، بۇ ئېغىر ۋەزىپىنى ئورۇنلاش ئۈچۈن مەزكۇر كومىتېت ھەيئەت ئەزالىرى ئىمكانىيەت دائىرىسىدە تىرىشچانلىق كۆرسەتمەكتە.

ئاكادېمىيە ئورگان تورى ©

ئۈستىگە قايتىش