ئۇيغۇرچە    Uyghurche    Уйғурчә   
  • «خەلقئارا ۋەزىيەت ۋە مىللىي كۆرەش يوللىرى» بويىچە تەربىيەلەش كۇرسى 2019-يىلى 14- ۋە 15- دېكابىر شەنبە-يەكشەنبە كۈنلىرى ئىستانبۇلدا ئېچىلىدۇ. ...
سىزنىڭ ئورنىڭىز: باشبەت » ئەدەبىيات گۈلزارى » يېڭى دەۋىر قوشاقلىرى

يېڭى دەۋىر قوشاقلىرى

ئابدۇلھەكىم كاشغەرىي

*

دېدى« ئەمدى كەڭچىللىك

ھەر ئىشقا مۇمكىنچىلىك

چىگرانى ئېچىۋەتتۇق

يوق رەسمىيەت قىيىنچىلىق

ئالغىن مانا پاسپورتۇڭ

ساغلام بولسا باش -پۇتۇڭ

چىقىپ چەتكە ھەركەت قىل

قوغدۇلىدۇ ھوقۇقۇڭ

پۇل تاپ ، يول تاپ زېرىكمە

سەبىرلىك بول تېرىكمە

سەرمايە قىل پۇلۇڭنى

يەرگە كۆمۈپ چىرىتمە»

دېگەنلىرى توزاقكەن

كۆرۈنمىگەن توساقكەن

يالغانچىلىق ھۈنىرى

دۇرۇسلۇقتىن ئۇزاقكەن

*

يەنە كەتتۇق ساختىغا

چۈشۈپ ئالدام خالتىغا

ئىبرەت ئالماي تارىختىن

تۇتقۇن بولدۇق ساقچىغا

تەھدىد سېلىپ ھەممىگە

(چوماق بېرىپ تەلۋىگە)

دەرھال تاپشۇر پاسپورتنى»

دېدى كىرىپ ئۆي -ئۆيگە

 *

سولىۋالدى لاگىرغا

دەرس بېرەرمىش «جاھىلغا»

ئۈچ يىل بەش يىل ياتارسەن

گەپ ياندۇرساڭ كادىرغا

 *

ئىسمى تەلىم -تەربىيە

ئىشىكتە ساقچى -ئارمىيە

«ئىقرار قىلساڭ كەڭچىللىك»

ئاكتىپ بولساڭ غەم يېمە

 *

«ھاجىم» بولدۇق مەككىدە

يېتىپ رۇبات -تەككىدە

ئەمدى سۇئال -سوراق بار

كۆڭۈل دەككە -دۈككىدە

 *

«تۈركىيەگە باردىڭىز

قەيەرلەردە قالدىڭىز؟

سۆزلەڭ ئەمدى بارىنى

ئويلاشقا كۆپ ۋاختىڭىز…»

*

دۈشمەن بولدى دوست -ئاداش

ھەتتا تۇققان-قېرىنداش

شۇم سىياسەت روھى بۇ

يوق ساۋاقداش، كەسىپداش

«قېنى پاش قىل داداڭنى

تۇغۇپ باققان ئاناڭنى

تۇتۇپ بېرىپ قۇتۇلغىن

ئاكا -ئىنى، تاغاڭنى…»

باينى قاماپ زىندانغا

تويغۇزدى پۇل تاپقانغا

زىيالىمۇ تۈرمىدە

تارىخ، كىتاب يازغانغا

 *

خوتۇن بالا قەيەردە؟

ئۇلار بىلمەس سەن نەردە؟

مۇنداق زۇلۇم بارمۇ ھېچ

مۇشۇ ئەسىر-دەۋىردە

يېتىم قالدى بالىلار

يىغلار ئاتا -ئانىلار

«بۆك ئال» دېسە كاللىنى

كېسىپ كېلەر غالچىلار

 *

زىندان بولدى ھەممەيەر

قامالغاندىن يوق خەۋەر

تەمتىلەيمىز ئەمادەك

ھەرقەدەمدە بىر خەتەر

دەيدۇ قوشماق تۇققان بول

بىر چۈشەكتە  ياتقان بول

«ئىتتىپاقلىق» دېگەن شۇ

سەنمۇ ھەسسە قاتقان بول

 *

دادام ئالغانمۇ ئاناڭنى

تاغام ئالغانمۇ ھامماڭنى

قانداق قوشماق تۇققان بىز

ئاكام ئالغانمۇ ئاچاڭنى

 *

ئوخشىمايدۇ ئېرقىمىز

يا رەڭگىمىز تىلىمىز

قايناتساڭمۇ قازاندا

قوشۇلمايدۇ قېنىمىز

 *

دەرت تۈگىمەس يازغانغا

سانىغانغا -ئېيتقانغا

دىلدا نەپرەت ئۆچمەنلىك

خىتاي مەلئۇن شەيتانغا

 *

بۇ قارا كۈنمۇ پۈتەر

بىزگىمۇ بەخىت كۈلەر

«بۇ بوتۇڭلارمۇ ئۆلەر

بىزنىڭ بالىلارمۇ كۈلەر» [1]

*

2018-يىلى ئاۋغۇست، ئىستانبۇل   

[1] خەلق قوشاقلىرىدىن

ئاكادېمىيە ئورگان تورى ©

ئۈستىگە قايتىش