• 2020-يىلى 21-مارت قۇتلۇق نورۇز كۈنىدە قۇتادغۇ بىلىگ ئىنىستىتۇتى ئۇيغۇر ئاكادېمىيىسى تەركىبىدە قۇرۇلدى. ...
You Are Here: Home » ئەدەبىيات گۈلزارى » دىل بايان

دىل بايان

ئاپتۇرى: سەرۋى

*

ئاڭلىنار تارنىڭ ئۈنى مەھزۇن كۆڭۈل ئىقرارىدەك،
بۇ پەلەك دەھشەتلىرىنىڭ بەررىنى ئىيتارىدەك.

ھەسرىتا، زەرب بىلەن سانجىدى ئەلەملىرىم،
پەيلىنى بۇزدى ئەجەپ جاننى خوپ ئالارىدەك.

*

سىرغىدى گۈلگۈن قېنىم سەل ئېلىپ ئەزۋەيلىدى،
مەيلىگە قويسام ئەگەر نەچچە چاھ تولارىدەك.

ئۈزدى تار بارماقلىرىم، ئۆچتى ھەم غەزەل ئۈنى،
مەن ئېتەي ئىسيان بۈگۈن يىغلىماي بىچارىدەك.

*

نالەيۇ-ئەفغان بىلە چاكۇ-چاك قىلدىم ياقام،
سۈركىدىم تۇپراق يۈزۈمگە جان بېرەر تەييارىدەك.

ئوۋچىدۇر نامەرد پەلەك ئوۋلىدى بەختىم مېنىڭ،
تويمىدى ئوۋلار تېخى قاپقانلىرى قۇرارىدەك.

*

ھەر كۆڭۈل بولدى مالال، سالدى گەر ماڭا نەزەر،
دەردلىرىم تەئرىپىگە يوق سەبىر چىدارىدەك.

نە ئەجىپ سوقتى يۈرەك كەچمىدى جاندىن تېخى،
چۆلدىكى ئالۋۇن كەبى چۈش ئۈچۈن ئاۋارىدەك.

*

توزغىدى نازغىپ چېچەك، بەردى جاي قەغەز يۈزى،
ناتىۋان دەردلىك كۆڭۈلنىڭ ئۈلپىتى دىلدارىدەك.

دەردىما، ئايۋان يۈزىنى باستى ئاق-ھالرەڭ چېچەك،
بىلمىدىم قانداق ئەلەم كىپ يەنە باسارىدەك.

*

ھەر يىلى غۇنچە ئېچىپ توزىماق چېچەك ئىشى،
ھىدىغا مەستانە بوپ مەن كۈتەي خۇمارىدەك.

شېخىدىن توزغان چېچەك ئۇچىدۇ شامالسىرى،
تىترىگەن بەرگى بىلەن بۇ يۈرەك ئوخشارىدەك.

*

سورىما، سەرسان چېچەككە نە ئۈچۈن قويدۇم مىھىر،
سىرلىرىم بايان ئېتىپ كۆزلىرىم تاشارىدەك.

چاچ چېچەك خۇشبۇي ھىدىڭ، مەست قىلىپ دەردلىك كۆڭۈل،
شۇندىلا دەردۇ-پىغان دەم مېنى ئۇنتارىدەك.

*

ھېلىگەر كەمپىر پەلەك شۇ قەدەر قىينار مېنى،
جامىدا لىقلاپ ئازاپ گۈل بىلە سۇنارىدەك.

ۋادەرخ، خاھلار كۆڭۈل گۈلگۈن چېچەككە ئالدىنىش،
جانىدىن كەچمەس كىشى شۇ كەبى ياشارىدەك.

*

2020- يىلى، 11-مارت، ئامېرىكا

ئەسكەرتىش: ئۇيغۇر ئاكادېمىيىسى تور بېتىدىكى يازمىلار ئاپتورنىڭ ئۆزىنىڭ كۆز-قارىشىغا ۋەكىللىك قىلىدۇ. تور بېتىمىزدىكى يازمىلارنى مەنبەسىنى ئەسكەرتكەن ھالدا كۆچۈرۈپ كەڭ تارقىتىشقا بولىدۇ.

ئاكادېمىيە ئورگان تورى ©

Scroll to top