You Are Here: Home » ئەدەبىيات گۈلزارى » كۈت مېنى – تېيىپجان ئېلىيېۋ

كۈت مېنى – تېيىپجان ئېلىيېۋ

تەييارلىغۇچى: تاران ئۇيغۇر

 

كۈت مېنى

تېيىپجان ئېلىيېۋ

*

ئەي، مېنىڭ جانانە يارىم، كۈت مېنى،

ئامرىقىم كۆزى خۇمارىم، كۈت مېنى،

يوللىرىمغا ئىنتىزارىم، كۈت مېنى،

ساڭا يەتمەكتۇر قارارىم، كۈت مېنى.

*

ئاسمىنىڭدا ئوينىسىمۇ شۇم بۇلۇت،

باغلىرىڭدا قۇترىسىمۇ ۋەھشىي جۇت،

ئۆپچۆرەڭدە كۆيسىمۇ دەھشەتلىك ئوت،

قورقمىغىن ھەرگىز نىگارىم، كۈت مېنى.

*

چىن يۈرەكتىن چىقتى ئۈشبۇ يازغىنىم،

يوق مېنىڭ ھەرگىز يولۇمدىن ئازغىنىم،

ئۇنتۇما پەرھات بولۇپ تاغ قازغىنىم،

ھېلىمۇ بار شۇ مادارىم، كۈت مېنى.

*

ھىلىگەرلەر ئاشكۆكىنى سەپسىمۇ،

ياسىمىن جادۇ كەبى گەپ تاپسىمۇ،

«ئاشىغىڭ يوق ئەمدى» دەپ پال ئاچسىمۇ،

ھېچ گۇمانسىزدۇر بارارىم، كۈت مېنى.

*

خام سانايدۇ شۇم رەقىپ چۆچۆرىنى،

ئەسلىتەر قورشاۋدا قالغان بۆرىنى،

سەنمۇ كۆرگەنسەن شۇ تامدەك تۇرقىنى،

گۆرىمۇ تەييار ئۇلارنىڭ، كۈت مېنى.

*

مەن تەرەپكە قارىغىن چولپانغا باق،

كۈنچىقىش ياقتىن ئاقارمىش تاڭغا باق،

شۇم رەقىبلەر چۆچۈگەن چۇقانغا باق،

يالتىرايدۇ زۇلپىقارىم، كۈت مېنى.

*

مەن بارارمەن پات يېقىندا يول ئېلىپ،

ئەلگە تونۇش غەلبە سازىنى چېلىپ،

چىقىسەن ئالدىمغا سەنمۇ قول سېلىپ،

توي قىلار ھېيتگاھ بازارىم، كۈت مېنى.

*

شۇندا باغرىمغا سېنى چىڭ تاڭمىسام،

شۇم رەقىبتىن ئىنتىقاملار ئالمىسام،

ئىككى يۈزلۈكلەرنى داغدا قويمىسام،

چىقمىغاي زادى خۇمارىم، كۈت مېنى.

1948-يىل، دېكابىر، غۇلجا 

ئەسكەرتىش: ئۇيغۇر ئاكادېمىيىسى تور بېتىدىكى ئەسەرلەر ئاپتورنىڭ ئۆزىنىڭ كۆز-قارىشىغا ۋەكىللىك قىلىدۇ. تور بېتىمىزدىكى ئەسەرلەرنى مەنبەسىنى ئەسكەرتىش شەرتى بىلەن كۆچۈرۈپ كەڭ تارقىتىشقا بولىدۇ.

ئاكادېمىيە ئورگان تورى ©

Scroll to top